பழனி பேருந்து நிலைய மதுக்கடைகள் மூடல்: தனியார் பார்களுக்குக் கிடைத்த ‘ஜாக்பாட்’ லாபமா?

தமிழகத்தில் போதைப்பொருள் இல்லாத மாநிலத்தை உருவாக்குவோம் என்ற தேர்தல் வாக்குறுதியின்படி, வழிபாட்டுத் தலங்கள், கல்வி நிறுவனங்கள் மற்றும் பேருந்து நிலையங்களுக்கு அருகில் உள்ள 717 டாஸ்மாக் மதுக்கடைகளை அடுத்த இரண்டு வாரங்களுக்குள் மூட மாண்புமிகு தமிழக முதலமைச்சர் விஜய் அவர்கள் உத்தரவிட்டுள்ளார். இந்த அறிவிப்பு ஒருபுறம் வரவேற்பைப் பெற்றாலும், இது வெறும் “சம்பிரதாய நடவடிக்கை” மட்டுமே என சமூக ஆர்வலர்கள் மற்றும் பொதுமக்கள் மத்தியில் விமர்சனங்கள் எழுந்துள்ளன.

தொடர்கதையாகும் மதுக்கடை மூடல் அறிவிப்புகள்

தமிழக வரலாற்றில் ஆட்சிப் பொறுப்பேற்கும் ஒவ்வொரு முதலமைச்சரும் குறிப்பிட்ட எண்ணிக்கையிலான மதுக்கடைகளை மூடுவதை ஒரு வழக்கமாகவே கொண்டுள்ளனர்.

• 2016: மறைந்த முதல்வர் ஜெயலலிதா 500 கடைகளை மூடினார்.
• 2017: முன்னாள் முதல்வர் எடப்பாடி பழனிசாமி 500 கடைகள் மற்றும் 169 பார்களை மூட உத்தரவிட்டார்.
• 2023: முன்னாள் முதல்வர் மு.க. ஸ்டாலின் ஆட்சியில் 596 கடைகள் மூடப்பட்டன.

தற்போது முதலமைச்சர் விஜய் அறிவித்துள்ள 717 கடைகள் மூடல் என்பது, முந்தைய ஆட்சிகளின் வரிசையில் ஒரு தொடர்ச்சியாகவே பார்க்கப்படுகிறது. இந்த நடவடிக்கைகளால் மது விற்பனை குறையவில்லை மாறாக ஆண்டுக்கு ஆண்டு அதிகரித்தே வருவதாக புள்ளிவிவரங்கள் தெரிவிக்கின்றன.

தனியார் பார்களுக்கு அடித்த லாட்டரி : பழனி நிலவரம்

முதலமைச்சரின் இந்த அறிவிப்பு அரசு கடைகளை மட்டுமே குறிவைப்பதாகவும், தனியார் பார்களுக்கு லாபம் ஈட்டித் தரும் வகையிலும் இருப்பதாகக் குற்றச்சாட்டுகள் எழுந்துள்ளன. குறிப்பாக பழனி பேருந்து நிலையப் பகுதியில் உள்ள 4 டாஸ்மாக் கடைகள் மூடப்படும் சூழலில், அதே 500 மீட்டர் சுற்றளவிற்குள் இயங்கும் தனியார் ‘மனமகிழ் மன்ற’ பார்கள் மூடப்படவில்லை.

இதனால், அரசு கடைகளுக்குச் சென்ற கூட்டமானது இனி கூடுதல் விலை கொடுத்து தனியார் பார்களைத் தஞ்சமடையும் சூழல் உருவாகியுள்ளது. இது அரசுக்குச் சேர வேண்டிய வருவாயைத் தனியார் முதலாளிகள் கொள்ளை அடிக்க வழிவகுக்கும் என்று சுட்டிக்காட்டப்படுகிறது.

விதிமீறல்கள் இன்னும் தொடர்கிறதா?

பழனியில் கல்வி நிறுவனங்கள் மற்றும் கோவில்களுக்கு மிக அருகாமையில் உள்ள சில குறிப்பிட்ட கடைகள் (எ.கா: மலையப்பசாமி வைத்தியசாலை எதிரில் உள்ள கடை, சோபியா பெட்ரோல் பங்க் அருகில் உள்ள கடை) இன்னும் மூடப்படாமல் இருப்பது ஏன் என்ற கேள்வியும் எழுப்பப்பட்டுள்ளது. 500 மீட்டர் விதிமுறை என்பது அனைத்து மது விற்பனை நிலையங்களுக்கும் பொதுவானதாக இருக்க வேண்டும் என்பதே மக்களின் கோரிக்கையாக உள்ளது.

பத்து ரூபாய் கூடுதல் வசூல்: கேள்வி எழுப்பும் பொதுமக்கள்

கடந்த ஆட்சிக் காலத்தில் மது பாட்டில்களுக்கு கூடுதலாக 10 ரூபாய் வசூலிக்கப்படுவதைக் கடுமையாக விமர்சித்தவர் தற்போதைய முதலமைச்சர் விஜய். ஆனால், தற்போதும் அதே நிலை நீடிப்பதாகவும், ஒரு பாட்டிலுக்கு 10 ரூபாய் எனத் தற்போதும் வசூலிக்கப்படும் தொகை யாருடைய “பவர் சென்டருக்கு” செல்கிறது என்றும் பொதுமக்கள் சமூக வலைதளங்களில் கேள்வி எழுப்பி வருகின்றனர்.

முடிவுரை: வெறும் கடைகளை இடமாற்றம் செய்வதோ அல்லது ஒரு சில கடைகளை மூடுவதோ “போதையில்லா தமிழகத்தை” உருவாக்கிவிடாது. தனியார் பார்களின் ஆதிக்கம், 24 மணி நேர கள்ளச்சந்தை விற்பனை மற்றும் முறையற்ற கூடுதல் வசூல் ஆகியவற்றை இரும்புக்கரம் கொண்டு ஒடுக்கினால் மட்டுமே இந்த அறிவிப்புக்கு உண்மையான அர்த்தம் கிடைக்கும்.

செய்தியாளர் : நா.ராஜாமணி. 8973350663.

#TASMAC #TamilNadu #Vijay #CMVijay #Palani #LiquorBan #TamilNaduGovernment #AlcoholFreeTN #SocialJustice